بتذكّرك : كلمات شعرية شعبية عن الشوق - كتابة غسان محمد جمول
بتذكرك كلما نسمات الهوا
عا وجي لاحوا
بتذكرك مع كل غيبة شمس
و شروق نهار و صباحو
بتذكرك مع كل دقة قلب
زرعتي بنبضو افراحو
و بصير اهديكي اشواق
مع طيور بلكي لعندك راحوا
يمكن هاك العصفور
الطاير يتعب جناحو
و يغط عا شباك صبية
قلبي بايدها مفتاحو
يحكيلها عن عاشق تعبان
عيونو من السهر ما ارتاحوا
و يغنيلها غنية عشق
و بشعرها يلامس جناحو
و عن جسمها يتنشق هاك العطر
اللي قلبي استسلملو و رمى سلاحو
و يبوسلي خدود و شفاف
بلونها و طعمها جسمي اجتاحو
ويصور هاك الضحكات
بلكي يرجع هالقلب يدق
و بلكي بينسى جراحو
